Farleg avfall
Farleg avfall er avfall som kan medføre fare for helse, liv og miljø.
Verksemda har sjølv ansvar for å undersøkje om avfallet som oppstår er farleg avfall. Alt farleg avfall må de emballere, merke og oppbevare forsvarleg for å unngå forureining eller skade på menneske eller dyr.
Slik handterer de Farleg avfall på jobb
- Oppbevar farleg avfall slik at det ikkje medfører fare for helse, liv og miljø.
- Sorter ulike typar farleg avfall kvar for seg.
- Oppbevar helst farleg avfall i originalemballasjen og sørg for at emballasjen er tett. Unngå å ha avfallsstoff som kan reagere med kvarandre, i nærleiken av kvarandre.
- Merk emballasjen slik at det kjem tydeleg fram at avfallet er farleg avfall.
- Dokumenter opphav, kvalitet og type avfall. Deklarasjonsskjema og rettleiing til korleis de gjer dette, finn de på avfallsdeklarering.no.
- Avhengig av kva avtale de har, blir avfallet anten henta hos dykk, eller så leverer de det til næraste mottak.
Slik handterer de grave- og rivemassar over grensa for farleg avfall:
- Gjennomfør analysar for å avdekke forureiningsgraden.
- Last ned skjema for basiskarakterisering, fyll det ut og lever det saman med avfallet.
- Er de usikre på korleis de skal gjennomføre analysen eller basiskarakteriseringa? Ta kontakt med avfallsselskapet de har avtale med for rettleiing.
- Ta kontakt med avfallsselskapet dykkar før de leverer massane. Ver merksame på at sjølv om eit mottak har løyve til å ta imot ein avfallstype, har dei ikkje nødvendigvis plikt til å ta den imot. Ulike deponi og avfallsanlegg kan også ha eigne mottakskriterium som avvik frå avfallsforskrifta.
Typiske produkt de sorterer som farleg avfall på jobb:
- Massar over grensa for farleg avfall
- Spillolje, refusjonsbetinga
- Spillolje, ikkje refusjonsbetinga
- Olje- og fettavfall
- Oljeforureina masse
- Drivstoff og fyringsolje
- Oljefilter
- Organiske løysemiddel utan halogen
- Måling, lim og lakk
- Sprayboksar
- Blyakkumulatorar
- Småbatteri
- Litiumbatteri
- Blåsesand
- Polymeriserande stoff, isocyanatar
- Herdarar, organiske peroksid
- Reingjeringsmiddel
- Surt organisk avfall
- Basisk organisk avfall
- Gassar i trykkbehaldarar